رَسانک نیوز

سئے شمبهئے رۆچا ۲۰ شهریور ۱۴۰۳، یک جهمنندێن بلۆچے شَمبِهئے رۆچا ۱۷ شهریور ۱۴۰۳، نزامی نیروانی راستێن تیرگواریان گلام اَلیئے سیمسرا دۆست‌مهمدئے شهرا هیرمندئے دمگان ٹپّیگ بوتگ، پد چه سئے رۆچا بازێن ٹپّانی سئوبا وتی ساهی چه دستا داتگ.

اے جهمنندێن بلۆچئے پجّار (نادر دهمرده)، ۲۵ سالگ، اَبدُل باکیئے چُکّ، سور کُرتگێن، دو کسانێن چُکّئے پت و گُلام‌اَلیئے هلکئے مردم چه دۆست مهمدئے هلکئے مردمان هیرمندئے دمگان گوشگ بوتگ.

گێشێن هالانی رِدا، نادر وتی هلکئے تها زمینان آپ دئیگئے کارا بوتگ چه سیمسرئے هنگئے نزامی نیروانی دستا که آییِش پجاه آورتگ بێد چه اۆشتارێنگ و هُشدار دئیگا راستێن تیرانی آماچ کُرتگ که چه پاد و لاپ و آپدانئے نێمگا ٹپّیگ بوتگ و چارمی رۆچا زابلئے نادراهجاها گۆن بازێن ٹپّان وتی ساهی چه دستا داتگ.

گوَشگ ببیت که سیمسرئے ههنگئے نیروان چه چُنت وهد پێش نادر تهدید کُرتگ که یا گۆن مارا همکاری بکن یا که ترا اجازت ندئیێن که وتی زمینانی سرا بیائے و کار بکنئے که هر رندا سیمسرئے هنگئے پرماندهی لۆٹ رد کُرتگ.

گۆن ۲۰۲۳ئے سالائے جم بوتگێن هالان، نزامی نیروانی راستێن تیرگواری سئوب بوتگ که کم چه کم ۱۲۰ بلۆچێن جهمنند کُشگ و ٹپّیگ کنگ ببیت. اِشانی تها ۸۰ کسا وتی ساه چه دستا داتگ و ۴۰ کس ٹپّیگ بوتگ که اِشانی تها ۹ گوَنڈێن چُکّ و ۳ جنێن هست‌اِنت.