رَسانک نیوز

چارشمبهئے بانگواها ۱۴ شهریور ۱۴۰۳، سمندێن ماشێنے پهرهئے شهرهئے ائول سرا ٹێلی بار بوتگ همے بارئے سئوبا آس گیپت و ماشین پورهی سُچیت و پُرَ بیت.

اے وئیلا کَسے ٹپّیگ نبوتگ و ماشینئے راننده پێسر چه ماشینئے آس گِرگا در بوتگ.

ٹێلکشی چه هما کاران انت که بازێن مردمے چه بلۆچستانا، مناسبێن و مُدامێن کارئے نێستیا، ٹێلکشیئے نێمگا رئونت که برے گۆن وئیلانے دُچار بنت وتی سر و مالا باێننت.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.