رَسانک نیوز

سئے شَمبِهئے رۆچا ۱۳ شهریور ۱۴۰۳، یک جهمنندێن بلۆچے، اتلاهات سپاهئے زاتی درێسێن نیروانی دستا بێد چه آمیدگسی هُکم و گۆن زورئے گۆما چهبارا آوار جنگ و نامالومێن جاهے برگ بوتگ.

اے جهمنندێن بلۆچئے پجّار (اَبدُل وهید هۆت)، ۳۸ سالگ، مئولابکشئے چُکّ و تلنگئے هلکئے مردم و چهبارئے نندۆک گوَشگ بوتگ.

گێشێن هالانی رِدا، اَبدُل وهید که کاشی‌کاریئے سرا کارا بوتگ پد چه اِشیا که چه کارئے سرا په نان و ورگئے واستا ڈنّا شُتگ، اتلاهاتئے سپاهئے نیروانی دستا گۆن زۆر آوار جنگ بوتگ و آییئے ماشین هم نامالومێن جاهے برگ بوتگ.

گوشگ بیت که آییئے لۆگئے مردم په آییئے آوار جنگئے سئوبئے جُستا و آییئے هالئے جُستا امنینی نهادان شتگ‌اَنت بله اے نهادانی اُگدهداران گوَشتگ‌ که انچێن کسے اِشانی آوار جتگێنانی تها نێست بله گندۆکێن مردمان گوَشتگ که آوار جنۆک اتلاهات سپاهئے نیرو بوتگ‌اَنت.