رَسانک نیوز

دوشمبهئے رۆچا ۱۲ شهریور ۱۴۰۳، پهره و سربازئے راها ٹێلکشّێن ماشینیئے ٹاێر ترکّتگ و ماشین چپّ بوتگ و ٹێلکشّێن ماشینئے راننده سکّ ٹپّیگ بوتگ که پد چه اِشیا که نادراهجاها برگ بوتگ همۆدا ساهی داتگ و چه همے وئیل سئوبا آییئے چُکّ هم ٹپّیگ اِنت.

بێران بوتگێن ٹێلکشّئے پجّار (ازیز ائدوزهی [براهویی])، اُمری ۳۴ سال بوتگ، پتئے نامی زاهرئے انت، سور کُرتگێن و چُکّئے واهُند و کسان سالێن چُکّئے پجّار (اِمران ائیدوزهی[براهویی])، اُمر ۱۱ سال انت، اَزیزئے چُکّ و هر دوێن دُزآپئے نندۆک گوشگ بوتگ‌اَنت.

اے وئیل پهره و سربازئےنیاما نزیک دمگ پهرها پێش آتکگ و اَزیزئے تویوتا وانت لاستیکئے ترکّگئے سئوبا رانندگیئے دئوران چپّ بوتگ که آ سکّ ٹپّیگ و پهرهئے خاتمُل اَنبیائے نادراهجاها برگ بوتگ که بازێن ٹپّان سئوبا ساهی داتگ و آییئے چُکّ که همراهی بوتگ ٹپّیگ بوتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.