رَسانک نیوز

یکشَمبِهئے رۆچا ۱۱ شهریور ۱۴۰۳، میرجاوهئے انتزامی نیروان دو ٹێلکشّ دُمبال داتگ و تیرگواری کُرتگ که سئوب بوتگ تیر ماشینئے ٹئیران بلگّیت و چپّ ببیت و بسُچیت که ماشینئے دوێن نندۆک آس سۆچیئے تهد ٹپّیگ بوتگ و یکے چه آیان کساس ۱۲ ساهتا رند گۆن بازێن ٹپّان وتی ساهی چه دستا داتگ.

بێران بوتگێن ٹێلکشّئے پجّار (مهمد زاروزهی)، ۱۸ سالگ، گپورئے چُکّ و ٹپّیگ بوتگێن ٹێلکشّئے پجّار (امید براهویی)، ۲۷ سالگ و هر دوێن دُزآپئے نندۆک گوَشگ بوتگ‌اَنت.

گێشگن هالانی رِدا، کساس رند چه زُهرا هان مهمدئے چاتئے هلکا یک ماشینئے که میرجاوهئے یگان امدادئے نزامی نیروانی بوتگ، یک وانتێن ٹێلکشیی دُمبا داتگ و راستێن تیرگواری کُرتگ که پشتئے ٹئێر گۆن تیرئے لگّگا پنچر بوتگ و سئوب بوتگ که ماشین چه وتی راها در بیئیت و چپّ بکنت و بسُچیت.

گوشگ بیت که اے وئیلئے ٹپّیگ بوتگێن مردم، هلکی مردمانی دستا چه ماشینا در کنگ بوتگ‌اَنت و دُزآپئے امام اَلیئے نادراهجاها برگ بوتگ‌اَنت که مامد بازێن ٹپّانی سئوبا کساس ۱۲ ساهتا رند وتی ساهی چه دستا داتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.