رَسانک نیوز

یکشَمبِهئے رۆچا ۱۱ شهریور ۱۴۰۳، کم چه کم یک بلۆچێن بندیگیئے اێدامئے هُکم که پێسرا مئوادئے سرا آییئے هُکم دئیگ بوتێ و جُمَهئے رۆچا په هُکمئے اجرا کنگئے واستا کهنۆچا بلۆچستانئے رۆدبار زمینئے هلکئے اێوکێن بندگا برگ بوتگ، اجرا کنگ بوتگ.

اے بندیگێن بلۆچئے پجّار (پرویز میربلۆچزهی [نارویی])، ۴۶ سالگ، ملک مهمدئے چُکّ، سور کُرتگێن، سئے چُکّئے پت و دهپابێدئے مردم و دُزآپئے نندۆک گوَشگ بوتگ.

همے هالانی رِدا، پرویز ۱۴۰۰ئے سالا آوار جنگ بوتگ و کساس یک سالے پێش آییئے اێدامئے هُکم دئیگ بوتگ بله آییئے مجگی سکته و جانئے شَل بئیگئے سئوبا هُکمئے اجرا کنگ لێٹ کنگ بوتگ.

گوشگی اِنت که شمبئے رۆچا ۱۰ شهریور، آییا وتی آهری گند و گپّ گۆن وتی لۆگئے مردمان کهنوچئے بندیگا کُرتگ.

گوشگ ببیت که ۲۰۲۳ ئے سالا کم چه کم ۱۸۴ بندیگیێن بلۆچ گۆن وڑ وڑێن جُرمان اێرانئے ۲۶ دگه دگه جاهێن شهران که دُزآپ گۆن ۵۴ کس و بیرجند گۆن ۳۱ کس گێشترێن ابێد انسانی هُکما اێدامئے هُکما مهکوم کنگ و اێدام کنگ بوتگ‌اَنت که اِشانی تها کساس چار جنێن هم هست.