رَسانک نیوز

گوستگێن رۆچا ۸ شهریور ۱۴۰۳، کم چه کم بلۆچ ٹێلکشّے پهره و بمئے شهدگا ماشین چپ کرتگ و چه بازێن ٹپ و تۆرانی سئوبا ساهی داتگ.

اے ٹێلکشّێن بلۆچئے پجّار (مهمد کئیوم دهکانی)، مهمد ایوبئے چُکّ و سرداپئے هلکئے مردم چه نسکتئے دمگان چه سربازا گوَشگ بوتگ.

همے هالانی رِدا، مهمد کئیومئے ماشین گۆن نامالومێن سئوبیا چه وتی راها درآتکگ و چپّ بوتگ و گۆن ٹپّانے که آییئے جانا بوتگ‌اَنت وتی ساهی چه دستا داتگ.

ٹێلکشی چه هما کاران هساب بیت که بازێنے چه بلۆچێن جهمنندان چه بلۆچستانئے جاه جاهان، مناسبێن و مُدامێن کارئے نێستیا، ٹێلکشیئے نێمگا شُتگ‌اَنت که برے گۆن لهتێن وئیلان چۆ گاڑیئے چپّ کنگ و امنیتی و نزامی نیروانی تیرشانیا دێم په دێم بنت و آیانی جانا تهدید کنت.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.