رَسانک نیوز

شَمبِهئے شپا ۳ شهریور ۱۴۰۳، نزامی نیروانے که راسکئے ورودیا ایست و بازرسیئے سرا اَنت ابێد چه اِشیا که هشدار بدئینت یک موتور والایئے نێمگا تیرگورای کُرتگ که سئوب بوتگ دوێن موتور سْوار ٹپّیگ ببنت.

دوێن ٹپّیگ بوتگێن جهمنندانی پجّار (سُهئیل سپاهی)، ۲۳ سالگ، کادرئے چُکّ و (اهمد سپاهی)، ۲۰ سالگ، مهمدئے چُکّ و یک و دگرئے سیاد و شستونئے نندۆک گوَشگ بوتگ‌اَنت.

گێشێن هالانی رِدا، رند چه اِشیا که اے دوێن جهمنند نزامی نیروانی تیرانی آماچ بوتگ‌اَنت، جهمنندێن مردم چه مامورانی اے کارا زهرشان بوتگ‌اَنت که ماموران وتی اے کارئے سئوب چۆ گوشتگ که اے چه جئیشُل اِدلئے (جیش العدل) گلئے مردمان اَنت بله هچ وڑێن کارے په آیانی دزگیر کنگئے واستا نکُرتگ و وتی هالا وئیلِش کرتگ‌اَنت.

گوشگ بیت که اے دوێن ٹپّیگ بوتگێن جهمنند هلکئے مردمانی دستا که اێرانشهرئے هاتمُل انبیائے اورژانسئے سرا  پئون کُرتگ بُرتگنت که سُهئیلئے هال سکّ هراب اِنت و نادراهجاهئے هاسێن جاها واپێنگ بوتگ.

گۆن ۲۰۲۳ئے سالائے جم بوتگێن هالان، نزامی نیروانی راستێن تیرگواری سئوب بوتگ که کم چه کم ۱۲۰ بلۆچێن جهمنند کُشگ و ٹپّیگ کنگ ببیت. اِشانی تها ۸۰ کسا وتی ساه چه دستا داتگ و ۴۰ کس ٹپّیگ بوتگ که اِشانی تها ۹ گوَنڈێن چُکّ و ۳ جنێن هست‌اِنت.