رَسانک نیوز

سئے شَمبِهئے رۆچا ۳۰ مرداد، ماشینیا که یک لۆگیئے مردم، چُکّ و جنێن سوار بوتگ‌اَنت گویمرکئے سربازئے کئورا پُهلئے نبئیگئے سئوبا گیرئے کُرتگ.

سربوتگێن هالانی رِدا، اے لۆگئے مردم که هارا گیرِش کُرتگ هلکی مردمانی دستا چه هارا در کنگ بوتگ‌اَنت بله آیانی ماشین که سمندێن ماشینے بوتگ آپئے تها مانتگ.

گوشگ بیت پُهلئے نێستی سئوب بوتگ چُنت هزار جهمنند که آیانی لۆگ سربازئے کئورئے آ دستا اَنت، ناچار ببنت چه کئورا بگوَزنت که برے په اِشیا که سهیگ نبنت برزا هئور و هار بوتگ هارئے تها گیر کننت.

یک جهمنندیا گۆن اے ویدیئوئے گرَگا نبشتگی: هئورئے درگتا اُگدهداران چنت دزگاه بولدزر اے جاها آورتگ و مُدام کئولِش داتگ که پُهلئے اڈ کنگئے کارا بِندات کننت بله کارئے تها هچ زانگ نبیت که اے زرّان کئے دُزّیت.

گوشگ ببیت که گوَئیمرکئے کئور یکّے چه سربازئے مزنێن کئورئے شاهڑان اِنت که آییئے راها بازێن جهمنندے چه پُهلا زبهر اَنت و هئور و هارئے وهدا کئورئے آ دگه نێمگا گیر کننت.