رَسانک نیوز

جُمَهئے رۆچا ۲۶ مرداد ۱۴۰۳، سرکاورانئے هلکا پهره و سربازئے راها یک رهگوَزێن دنا ماشینے و یک ٹێلکشّیئے ڈیکّ ورگا، ۷ کس چه دوێن ماشینانی نندۆکان که دو کس ٹیلکشّ بوتگ‌اَنت آسئے تها وتی ساهِش چه دستا داتگ.

دوێن ٹێلکشّانی پجّار (مهمد رییسی)، اَبدُلمجیدئے چُکّ و (زبئیر رییسی)، مرادبکشئے چُکّ، هر دوێن سربازئے مردم و پهرهئے نندۆک گوَشگ بوتگ‌اَنت.

چه ۵ێن دنائے ماشینئے نندۆکان که گوَشگ بوتگ چه یک لۆگیئے مردمان و هُراسانئے مردمان اَنت تا انّون هچ هالے نێست.

اے وئیل کساس ساهت پنچا سرکهورانئے هلکا پهرهئے دمگان پێش آتکگ که سئوب بوتگ دوێن ماشین آس بگرنت و هپت کس چه ماشینانی نندۆکان وتی ساها آسئے تها چه دستا بدئینت.

گوَشگ ببیت که گۆن سالئے جم کُرتگێن هالان، ۲۰۲۳ئے سالا کم چه کم ۳۲۱ ٹێلکش گۆن نزامی نیروانی راستێن تیرگواریان، جادّهی وئیلان، نامالومێن سلاهبندێن مردمانی تیرگواریان، هار و آس سۆچیان بێران و ٹپّیگ بوتگ‌اَنت.