رَسانک نیوز

پنچشمبهئے رۆچا ۱۸ مرداد ۱۴۰۳، اۆرکیئے دو راهیا یک سایپایا گۆن تویوتاێن ماشینئے ڈیکّر وارتگ، دوێن ٹێلکشّێن ماشینانی راننده، گوشنت کمُک سَربُری ٹپّیگ بوتگ‌اَنت.

اے ٹێلکشّانی پجّارا تان انگت هچ هالے نێست و گوَشگ بیت، که آیانی ماشینان سکّ نُکس دیستگ.

ٹێلکشی چه هما هاترناکێن کاران هساب بیت که هر رۆچ چه بلۆچستانا بازێن بلۆچے چه دست سرکارئے مردمان یانکه جاده‌ای وئیلان مِر اَنت و ٹپیگ بنت.

سئوب چه بێکاری و مناسبێن زۆرگارئے نبئیگا، ٹێلکشیئے نێمگا رئونت که برے لهتێن گاڑیانی چپّ کنگئے سئوبا و لهتێن امنیتی و نزامی نیروانی تیرگواریئے سئوبا وتی جانا چه دست دئینت.

گوَشگ ببیت که گۆن سالئے جم کُرتگێن هالان، ۲۰۲۳ئے سالا کم چه کم ۳۲۱ ٹێلکش گۆن نزامی نیروانی راستێن تیرگواریان، جادّهی وئیلان، نامالومێن سلاهبندێن مردمانی تیرگواریان، هار و آس سۆچیان بێران و ٹپّیگ بوتگ‌اَنت.