رَسانک نیوز

سئے شمبهئے بانگواها ۱۶ مرداد ۱۴۰۳، سئے بندیگئے اێدامئے هُکم که چه آیان یکے بلۆچ و یکے کرد اے، مئواد و کتلئے جُرما که پێسرا اێدام و بێڑئے سرا مهکوم کنگ و دو رۆچ پێسر چه هُکمئے اجرا کنگا بندراَباسئے مرکزی اێوکێن بندیگا برگ بوتگ‌اَنت، اجرا کنگ بوتگ.

بلۆچێن اێدام بوتگێن بندیگیئے پجّار (امینُ الّاه نارویی)، ۴۲ سالگ، موسائے چُکّ، زابلئے مردم و اێرانشهرئے نندۆک و کُردێن بندیگیئے پجّار (همزه گراوند)، کساس ۲۸ سالگ، اهمدئے چُکّ، سور نکُرتگێن، کۆهدشتئے مردم چه لرستانئے دمگان و آ دگه بندیگیئے پجّار (آزاد اَبدُلّاهی)، کساس ۴۵ سالگ و بندراَباسئے نندۆک گوَشگ بوتگ.

هال وشئے هالانی رِدا، امینُ الّاه ۱۴۰۰ئے سالا و همزه گراوند ۱۴۰۱ئے سالا، گۆن مئوادئے جُرما بندراَباسئے شهر نزامی نیروانی دستا آوار جنَگ بوتگ‌اَنت و اے شهرئے انکلابئے دادگاهئے نێمگا اێدامئے سرا مهکوم کنگ بوتگ‌اَنت.

آ دگه بندیگی آزاد اَبدُلّاهی یک هۆریگێن پروندهیئے تها گۆن (روزبه) کَتلئے جُرما، کساس ۱۹ سال پێش دزگیر کنگ و اێدامئے سرا مهکوم کنگ بوتگ‌اَنت که چارێن بندیگی یکشمبهئے رۆچا ۱۴ مرداد چه بنداَباسئے آمێن بندان اێوکی جاها په اێدانئے هُکمئے اجرا کنگئے واستا برگ بوتگ‌اَنت که روزبهئے هُکم اجرا کنگ نبوتگ و آمێن بندا برگ بوتگ.

گوشگی اِنت کا دوشمبهئے رۆچا ۱۵ مرداد ۱۴۰۳، امینُ الّاهئے لۆگئے مردمان، پێسر چه اێدام بئیگا بندراَباسئے بندیگا گۆن آییا آهری گندُک کُرتگ.

گوشگ ببیت که ۲۰۲۳ ئے سالا کم چه کم ۱۸۴ بندیگیێن بلۆچ گۆن وڑ وڑێن جُرمان اێرانئے ۲۶ دگه دگه جاهێن شهران که دُزآپ گۆن ۵۴ کس و بیرجند گۆن ۳۱ کس گێشترێن ابێد انسانی هُکما اێدامئے هُکما مهکوم کنگ و اێدام کنگ بوتگ‌اَنت که اِشانی تها کساس چار جنێن هم هست.