رَسانک نیوز

دوشمبهئے رۆچا ۱۵ مرداد ۱۴۰۳، یک بلۆچێن جهمنندے که شستونئے نندۆک‌اِنت مگسئے تها نامالومێن سلاهبندێن مردمانی تیرانی آماچ بوتگ و وتی ساهی چه دستا داتگ.

اے جهمنندێن بلۆچئے پجّار (مهمد رییسی)، کساس ۲۳ سالگ، بکشێنئے چُکّ و شستونئے نندۆک گوَشگ بوتگ.

همے هالانی رِدا، کساس رۆچئے اێر رئوگئے وهدا مهمد رَند چه اِشیا که مهرستانئے شهرا بازارا رئوت نامالومێن سلاهبندێن مردمانی راستێن تیرگواریانی آماچ بوتگ که گۆن چُنت تیرئے ورگا لاپ و دلئے نێمگا سکّ ٹپّیگ و وتی ساهی چه دستا داتگ.

چه جنۆکانی جنَگئے سئوب و آیانی پَجّارا هچ هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.