رَسانک نیوز

یک کارگرێن جهمنندێن بلۆچے که آییا شناسنامه نبوتگ و یزدئے نندۆک بوتگ کساس دو ماه پێش نزامی نیروانی دستا آوار جنَگ بوتگ و اپگانستانئے سیمسرا رَد کنگ بوتگ و چه آییئے هالا هچ هبرے نێست.

اے بے شناسنامهێن جهمنندێن بلۆچئے پجّار (اَبدُلهالک رکشانی)، ۳۳ سالگ، مهمدئے چُکّ، سور کُرتگێن و ۶ چُکّئے پت و دُزآپئے مردم و یزدئے نندۆک گوَشگ بوتگ.

گوشگی اِنت اَبدُلهالک گۆن وتی لۆگئے مردمان یزدئے نندۆک‌اِنت و کارگریئے درۆشما کارا بوتگ که کساس دو ماه پێش نزامی نیروانی دستا آوار جنَگ بوتگ و دومی رۆچئے آوار جنَگا چه وتی آوار جنگئے سئوب که بے شناسنامهی بوتگ هبری داتگ و رند چه آییا هچ دگه هالے چه آییا نێست.

همے هالانی رِدا آتکگ که آییئے لۆگئے مردمان رَند چه اشیا که آییئے دُمبا بوتگ‌اَنت و یزدئے اردوگاها شتگ‌اَنت زانتگِش که آیی رَند چه چُنت رۆچا که آوار جنَگ بوتگ اپگانستانئے سیمسرا گوازێنگ و رهادگ کنگ بوتگ.

گوشگی اِنت که نزامی نیروانی اے کارئے سئوبا و انّون و ۶ مرداد ۱۴۰۳، گۆن دو ماهئے گوَزگا هچ هالے چه اَبدُلهالکا نێست و آییئے موبایل هم هامۆش اِنت.