رَسانک نیوز

مرۆچی دوشمبه ۱ مرداد ۱۴۰۳، دو ماشین که یک پراید و ٹێلکشّێن لندکروزے بوتگ کساس پیشنئے سدئے دو راهیا راسکئے دمگان که سئوب بوتگ پراید والا بێران و لندکروز والا ٹپّیگ ببیت.

بێران بوتگێن جهمنندئے پجّار (اَبدُلگنی بهی)، پیشنئے سدّئے بُنپان و ٹپّیگ بوتگێن ٹێلکشّئے پجّار (اَبدُلهک) چه سهربنئے هلکا کیشکئورئے دمگان چه سربازئے شهرئے نندۆک گوشگ بوتگ.

همے هالانی رِدا، اے دوێن ماشینان کساس پیشنئے گۆن یک و دگرا ڈیکّر وارتگ که اَبدُلگنی جاه په جاه بێران بوتگ و اَبدُلهکّ ٹپّیگ بوتگ و راسکئے نادراهجاها برگ بوتگ.

ٹێلکشی چه هما کاران هساب بیت که بازێنے چه بلۆچێن جهمنندان چه بلۆچستانئے جاه جاهان، مناسبێن و مُدامێن کارئے نێستیا، ٹێلکشیئے نێمگا شُتگ‌اَنت که برے گۆن لهتێن وئیلان چۆ گاڑیئے چپّ کنگ و امنیتی و نزامی نیروانی تیرشانیا دێم په دێم بنت و آیانی جانا تهدید کنت.

گوَشگ ببیت که گۆن سالئے جم کُرتگێن هالان، ۲۰۲۳ئے سالا کم چه کم ۳۲۱ ٹێلکش گۆن نزامی نیروانی راستێن تیرگواریان، جادّهی وئیلان، نامالومێن سلاهبندێن مردمانی تیرگواریان، هار و آس سۆچیان بێران و ٹپّیگ بوتگ‌اَنت.