رَسانک نیوز

یکشمبهئے رۆچا ۳۱ تیر ۱۴۰۳، نزامی نیرو مهرستانئے شهرا ٹێلکشانی راهئے سرا کمین کننت و چه اے ٹێلکشّێن مردمان زۆرگپتی کننت.

گوشگی اِنت نزامی نیرو ٹێلکشانی ابێد اسلی راهئے سرا کمین کننت و ماشینان اۆشتارێننت و په اِشیا که آیان اجازه بدئینت په رئوگا په زۆر چه آیان پول گرنت.

ٹێلکشی چه هما کاران هساب بیت که بازێنے چه بلۆچێن جهمنندان چه بلۆچستانئے جاه جاهان، مناسبێن و مُدامێن کارئے نێستیا، ٹێلکشیئے نێمگا شُتگ‌اَنت که برے گۆن لهتێن وئیلان چۆ گاڑیئے چپّ کنگ و امنیتی و نزامی نیروانی تیرشانیا دێم په دێم بنت و آیانی جانا تهدید کنت.

گوَشگ ببیت که گۆن سالئے جم کُرتگێن هالان، ۲۰۲۳ئے سالا کم چه کم ۳۲۱ ٹێلکش گۆن نزامی نیروانی راستێن تیرگواریان، جادّهی وئیلان، نامالومێن سلاهبندێن مردمانی تیرگواریان، هار و آس سۆچیان بێران و ٹپّیگ بوتگ‌اَنت.