رَسانک نیوز

پنچشمبهئے سُهبا ۲۸ تیر ۱۴۰۳، یک بلۆچێن بندیگے که پێسرا یک بسیجیئے کُشگئے جُرما اێدامئے هُکما مهکوم کنگ بوتگ دُزآپئے بندیگا اجرا بوتگ.

اے جهمنندێن بلۆچئے پجّار (ادریس جمشیدزهی)، کساس ۴۵ سالگ، کرمبێکئے چُکّ، پنچ چُکّئے پت، تێگ آپئے هلکئے نندۆک چه ڈمّنئے دمگان اێرانشهرئے شهرا گوَشگ بوتگ

همے هالئے رِدا، ادریس ۱۳۹۶ئے سالا یک پرماندهیئے کُشگئے جُرما که یکّے چه کاسم سُلئمانیئے سنگتان گۆن اَبدُلکریم سجادیئے پجّارا بوتگ و دُزآپئے دومی کئیپری جاها انکلابئے دادجاها اێدامئے هُکما مهکوم بوتگ.

گوشگ بیت که ادریس یک مزهبی و سوپێن کسے بوتگ که وتی نندگئے جاها کشاورزیئے کارا مشکول بوتگ و رَند چه آوار جنگا، بازداشتجاهئے تها شکنجه و په زۆر منّێنگ بوتگ بله بازێن رندے دادجاهاهئے تها وتی جُرمی نمَنّتگ‌اَنت.

گوشگ ببیت که پێسریگێن رۆچا وتی آسری گندُک گۆن وتی لۆگئے مردمان انجامی داتگ و آییئے جنازهئے نماز زی اَسُرا رند ڈمّنئے تها چه اێرانشهرئے دمگان وانێنگ بوتگ.

سئید اَبدُلکریم سجادی یکّے چه اێرانشهر و بزمانئے بسیج و سپاهئے کارندهان بوتگ که بازێن نیروے په سوریائے جنگئے واستا جمی کُرتگ. آییی ۱۳۹۶ئے پروردین ماها اێرانشهرئے تها تالکانیا رۆڈا وتی لوگئے دپا گۆن چُنت تیرئے ورگا وتی ساهی چه دستا داتگ.

گوشگ ببیت که ۲۰۲۳ئے سالا کم چه کم ۱۸۴ بلۆچێن زندانی گۆن وڑ وڑێن جُرمان چه اێرانئے ۲۶ شهرا که دُزآپئے بندیگا ۵۴ و بیرجندئے بندیگا ۳۱ کس گۆن گێشترێن گئیر انسانی اێدامئے هُکما، اێدام کنگ بوتگ‌اَنت که اِشانی تها کساس چار جنێن هم بوتگ.