رَسانک نیوز

چارشمبه رۆچا ۲۷ تیر ۱۴۰۳، یک ۱۹ سالگێن جنێن چُکّے ڈمّنئے کئور پهرهئے شهرئے دمگان گۆن بُکّگا وتی ساهی چه دستا داتگ.

اے جهمنندئے پجّار (پائزه کاسمزایی)، ۱۹ سالگ، اێرانشهرئے دمگان رسول آبادئے نندۆک گوَشگ بوتگ.

همے هالانی رِدا، پائزه و دگه دو کس ڈمّنئے کئورا شتگ‌اَنت که آپئے جُهلیئے و هُژناگئے نابلدیئے سئوبا آیی بُکّتگ و آ دگه دوێن کس هلکئے مردمانی دستا نجات دئیگ بوتگ‌اَنت.

گوَشگی اِنت که پائزه رَند چه بُکّگا، آپئے چێرا شُتگ و آییئے لاش رَند چه هلکی مردمانی پٹّ و پاسا چه آپا کشّگ بوتگ.