من وتی چُکئے مرکئے ھال اِشکت بله من نه گرێت پرچا که من زانان منی چُک یک شێرزالے اَت و یک مُکهمێن پگرے واھند بوتگ پمێشکا اگن من بگرێوان گُڑا منی چُکا دوست نبیت . منی چُک کریمها درانڈێهیئے زندگی ھچبر دوست نبوتگ. منی چُکّا گۆن بلۆچستانئے کۆهان ، کِشکان، دمکان، مێتگان، دْرچکان گۆن وتی مچکدگان سک مهر بوتگ۔ کینڈاها بئیگا ابێد ھم اشانی بابتا مُدام گۆن من ترانِ کرتگ منا مُدام گوَشتگی که اودئے پَٹ و ڈنان اودئے بهشتێن ندارگان مُدام منی سلامان بِدئے۔ ھر وھدا ٹیلپون کُرتگ گُڑا وتی دْرستێن ھمساھگانی یک یکا ھال جست کنان کرتگ ۔ کریمه بلۆچئے یات نون منی زندے آسان انت و من انچش گمان بیت که ھپت اێن آزمانا کسێا منی سرا دئور داتگ اَنت بله منی چمّان چه ارس درایَگ نه‌اِنت پرچا که منی چُکّا پگر کرتگ۔ اے راہ په وت درگێچتگ۔ آ تهنا په وت زندگ نبوتگ بلکێن ھر بێگواھێن بلۆچ ورنایانی آجویئے جنگا بوتگ۔

نون منی پشکپتگێن زِند کریمه یاتانی سارتێن ساھگا گوَزیت ۔ من نومبر 2015ئے ھما بێگاهَ هچبر بے ھال نکنان که من مگربے نماز وانت ھلاس کرت گُڑا آ درِکا آتک وتی سری منی کۆنڈ سرا اێر کرت و منا گوشگا لگّت من سک دُور رئوگا آن.
من آییئے سر سمارِت گْوشت من ندر و کئولیگ باتان بله کُجا رئوگائے تئو؟ وتی ماتا وتی مێتگا پرچا یل کنگ و رئوگائے؟ ترا ھچبر ڈنا رئوگ و نندگ کدی دوست نبوتگ۔ البت من اے وھدا ھاموش بوتان پرچا که لھتئے سالا پێش آییئے ویزا اتکگ اَت بله آ ڈنا نه‌شُت۔ آييا گْوشت “من ھرچه کُرت کنان بله منا اینچُک ھمت نێست که وتی مێتگا یل بکن آن و دگه جاھێا برئوان. بله اے رندا آ لهتێن رۆچانی تها در آتک و شُت۔ وھدے که من آییئے رسێنگا بالی پَٹا شُت آن. گُڑا اودا من لهتئے بلۆچی شئێر وانت که آییانی تها گۆن وتی ملک و مێتگا مهر کنگئے زێباێن ھئیال اَتنت۔ آییا منا گوشت که “امّان اے شئێران پرچیا وانگائے ؟ زانان اے شئێر منا چه رئوگا نه دار اَنت؟”

گڑا من وتی چُک موکل دات که برئو اودا وتی وانگا سرجم کن، وتی مول و مُرادا سرجم کن و زوت پدا واتر بیا۔ اے ساھتا منی چم ارسیگ اَتنت بله من نه لوٹێت که کریمه منی چمانی ارسان بگندیت و رئوگا کوتاہ بکنت پمێشکا من چه آییا وتی چم چێر دات اَنت۔

دْرێگتێن ھما وھدا من چۆش مه کرت اێن که بلکێن آییئے ٹورنٹوا مرکئے شکار نبوتگ‌اَت۔ چه کسانیا کریما سورے گپ بوتگ من تُرسێتگ که آ چمان دور رئوت بله پدا ھم ما آییئے سورا وتی رسم و رئواج آن ھُب بوتگ۔ بله بَژن ما چُش کرت نه کُت۔ وھدے آ کینڈایا شُت گڑا اے وھدا ھمل ھێدرا ھَبر آورت۔ ھملی لوگئےمردمان گۆن پجارۆکی ھست اَت۔ ھمل ھم ڈنا اَت۔ کریمه پِت و برات رازیگ بوت اَنت گُڑا ھمه سئوبا من ھمل زۆرت کینڈایا سور بوت۔ ھمه وھد و جاورانی زۆراکیان پجیگا آ دوئێنانی سور ات اے رۆچان منی کسترێن برات ماسٹر نور اھمدے ژانگولێن کُنٹ مارا رستگ اَت۔ ھمه سئوبا ما ھم بلۆچستانا کریمه سورا شاتکامی نکرت.