رَسانک نیوز/ یکشمبے 15 شهریور ماہ 1405، دھک ءُ سرجنگل ئے راہ ءَ یک بے نمبر پلیٹیں کاپرا گاڑییے، سلاہ‌بندین ءُ پَجّار نه بوتگیں مردمانی تیرگواری ئے دپ ءَ کپتگ، اے تیرگواری ءَ گاڑی ءَ نندوکیں دویں مردمان ءَ تیر وارتگ ءُ ساہ داتگ.

کُشگ بوتگیں مردمانی پَجّار «ابولپزل اُودی» ءُ «کیوان رمروردی»، گوَشگ بوتگ که اُرش ئے وھدا گاڑی ءَ نندوک بوتگ اَنت.

گوشنت: ھماں گاڑی که اے کارندگان ءَ کارمرز کرتگ کاپرا گاڑی ءُ بے نمبر پلیٹ ءَ بوتگ. تاں ھم داں انگتا کُشگ بوتگیں مردمانی گوں امنیتی ادارھاں جُڑگ بوھگئے بارئوا اَلّمیں ھالے دست نه کپتگ. ھچ گلیا داں انگتا اے اُرشئے زمّهواری نه منّتگ.

رَسانک نیوز/ مروچی دوشمبے 16 شهریور ماہ 1405 ءِ بانگواہ ءَ، پهرہ ءَ بلوچے سلاہ‌بندیں مردمییے تیرگواری ئے دپ ءَ کپتگ ءُ چه بازیں ٹپّاں ساھی داتگ.

رَسانک ءَ اے بلوچئے پجّار «بنیامین ائیدوزھی»، 24 سالگ، الله نور ئے چُک، پهرہ ئے جهمنند زانتگ.

رَسانک ءِ ھال سرکنوکانی رِد ءَ، سلاہ‌بندیں مردم ءَ بانگواھئے ساھت 2 ئے وھدا ماں یکے چه پهرہ ئے روڈاں بنیامین ءَ پہ رگبار بستگ، آییا ماں دست ءُ سینگ ءَ تیر لگّتگ، بنیامین ءَ چه بازیں ٹپّاں ساہ داتگ. سلاہ‌بندیں مردم رَند چه تیرگواری ءَ چه جاھا در شُتگ.

داں انگتا تیرگواری ئے سئوب ءُ ویلئے پُژدر زانگ نه بوتگ.

رَسانک نیوز/ یکشمبے 15 شهریور ماہ 1405، واش ءُ دزاپ ءِ راہ ءَ بلوچے که چه واش ءَ دیم په دزاپ ءَ روگ ءَ بوتگ راھانی پلیسئے جاگهئے نزّیک ءَ سلاہ‌بندین ءُ پَجّار نه بوتگیں مردمانی تیرگواری ئے دپ ءَ کپتگ، تیر ئے ورگ ءَ رَند گاڑیئے کنٹرول چه آییئے دست ءَ ڈنّ بوتگ ءُ لیٹی وارتگ. ٹپّیگ بوھگ ءَ رَند آیی نادراہجاہ ءَ سرکنگ بوتگ که چُنت ساھت ءَ پد ماں نادراہجاہ ءَ ساھی داتگ.

رَسانک ءَ اے بلوچئے پجّار «ندا‌مهمد ھانزھی»، کِساس 55 سالگ، آروس کرتگ ءُ زھگانی پت اِنت، واشئے نندوک ءُ دزاپ ءِ جهمنند زانتگ.

رَسانک ءِ ھال سرکنوکانی رِد ءَ، سلاہ‌بندیں مردمان ءَ آییئے گاڑی ئے سرا تیرگواری کرتگ، پد چه اشیا که گاڑییے ٹئیران ءَ تیر لگّتگ، گاڑی چه کنٹرول ءَ ڈنّ بوتگ ءُ لیٹ وارتگ. اے ویل ءَ پد آیی سکّ ٹپّیگ بوتگ ءُ گوں نگیگیں ھالت ءَ نادراہجاہ ءَ سرکنگ بوتگ. چُنت ساھت ءَ رَند چه بازیں ٹپّاں ماں نادراہجاہ ءَ ساھی داتگ.

داں انگتا سلاہ‌بندیں مردمانی پجّار ءُ آیانی سئوب زانگ نه بوتگ. بله گُمان اِشنت که سلاہ‌بندیں دُزّ بوتگ اَنت.

رَسانک نیوز/ شمبے روچ 14 شهریور ماہ 1405، راسک ءِ پیشین دمگ ءَ بلوچے وتی لوگئے نزّیک ءَ سلاہ‌بندیں مردمانی تیرگواری ئے دپ ءَ کپتگ ءُ چه بازیں ٹپّاں ساھی داتگ.

رَسانک ءَ اے بلوچئے پجّار «زمان جدگال»، کِساس 23 سالگ، گپور ئے چُک، راسک ءِ پیشین دمگئے نندوک زانتگ.

رَسانک ءِ ھال سرکنوکانی رِد ءَ، زمان وتی لوگئے نزّیک ءَ سواری گاڑییے سلاہ‌بندیں نندوکانی تیرگواری ئے دپ ءَ کپتگ ءُ تیری وارتگ، چه بازیں ٹپّان ءَ آییا ساہ داتگ.

داں انگتا تیرگواری کنوکانی پجّار ءُ آیانی سئوب چه اے کار زانگ نه بوتگ.

رَسانک نیوز/ شمبے 14 شهریور ماہ 1405، ھامون ءَ لوتک ئے ورمال دمگ ءَ بلوچییے لوگئے سرا سلاہ‌بندین ءُ پَجّار نه بوتگیں مردمان ءَ اُرش ءَ رَند آییئے گردن ئے شهرگ بُرّتگ ءُ ماں سر ءَ تیر جتگ ءُ کُشتگ.

اے بلوچئے پجّار «منسور براھویی (زیرکاری)»، 29 سالگ، امیر ئے چُک، آروس کرتگ ءُ ھامون ئے ورمال دمگئے نندوک زانگ بوتگ.

رَسانک ءِ ھال سرکنوکانی رِد ءَ، بانگواہ ئے ساھت 3 ئے وھدا چُنت سلاہ‌بندین ءُ پَجّار نه بوتگیں مردمان ءَ منسور ئے لوگ ءَ دَور اِش کُرتگ ءُ پد چه اشیا که آیان ءَ منسور ئے گردن ئے شهرگ بُرّتگ گوں وتاس ءَ آییا ماں سرا تیرِش جتگ ءُ کارواییا رَند چه جاھا دَر شُتگ اَنت. منسور براھویی ءَ ماں اے اُرش ءَ ساہ داتگ.

اے بلوچئے سیادان ءَ گوَشتگ: پیش چه اشیا، آییا ھچ وڑیں مالی یانکہ زاتی جیڑھی گوں کسی ءَ نه بوتگ ءُ داں انگتا جنوکانی پجّار ءُ آیانی سئوب چه اُرش ءَ زانگ نه بوتگ، گیشتریں ھالے اے بارئوا دست نه کپتگ.

رَسانک نیوز/ پنچشمبے 12 شهریور ماہ 1405 ءَ، سب ءُ سوران ءَ بلوچے که وتی لوگئے دیما اُوشتوک بوتگ، سلاہ‌بندیں مردمانی تیرگواری ئے دپ ءَ کپتگ ءُ ساھی داتگ.

رَسانک ءَ اے بلوچئے پجّار «مهمد‌کریم ھنپی‌نژاد (پرکی)، کِساس 43 سالگ، ابدلهکیم ئے چُک، سب ءُ سوران ئے چاه شیروان دمگئے نندوک زانتگ.

رَسانک ءِ ھال سرکنوکان ءَ گوَشتگ: سباھئے ساھت چار ئے وھدا سلاہ‌بندیں مردمان ءَ لوگئے دروازگ جَتَگ، آییا دروازگ پچ کرتگ که سلاہ‌بندیں مردمان ءَ آییئے سرا تیرگواری کرتگ، اے تیرگواری ءَ آییا تیر وارتگ ءُ ساہ داتگ.

سلاہ‌بندیں مردمانی پجّار ءُ آیانی سئوب داں انگتا زانگ نه بوتگ.

رَسانک نیوز/ چارشمبے 11 شهریور ماہ 1405 ءَ، شستون ءَ سلاہ بندیں مردمان ءَ بلوچییے سرا آییئے لوگئے دیما تیرگواری کرتگ. اے تیرگواری ءَ آییا تیر وارتگ ءُ ساہ داتگ.

رَسانک ءَ اے بلوچئے پجّار «منسور مستپایی‌ سرجو»، کِساس 45 سالگ، گل‌مهمد ئے چُک، شستون ءِ بکشان دمگئے نندوک زانتگ.

رَسانک ءِ ھال سرکنوکانی رِد ءَ، سلاہ‌بندیں مردماں اے بلوچئے لوگ ءَ چه دیوال ءَ تها بوتگ ءُ آییئے سرا که لوگئے پیشدر ءَ اُوشتوک بوتگ تیرگواریش کرتگ، آییا تیر وارتگ ءُ ساہ داتگ.

داں انگتا سلاہ‌بندیں مردمانی پجّار ءُ آیانی سئوب زانگ نه بوتگ.

رَسانک نیوز/ پنچشمبے 12 شهریور ماہ 1405 ءِ سباھا، نزامی ءُ امنیتی ٹولی ءَ گوں دھاں نزامی گاڑی ءَ دزاپ ءِ ھسارونیه دمگئے سرا اُرش کرتگ ءُ پد چه پرّیگیں لوگئے چاربند کنگ ءَ، لوگ ءَ نندوکیں مردمانی گون ءَ کریب دو ساھت ٹکّر اِش زورتگ. اے تیرگواری ءَ دو مردم ءَ تیر وارتگ ءُ کُشگ بوتگ.

کُشگ بوتگیں بلوچئے پجّار «یاسین نارویی»، کِساس 24 سالگ، گلام شاہ ئے چک ءُ دزاپ ءِ نسرت‌آباد دمگئے نندوک زانگ بوتگ، آ دگه مردمئے پجّار که مهمانی بوتگ داں انگتا زانگ نه بوتگ.

رَسانک ءِ ھال سرکنوکانی رِد ءَ، نزامی ءُ امنیتی ٹولی سباھئے ساھت 6 ئے وھدا گوں کریب 25 نزامی گاڑی ءَ دزاپ ءِ ھساروئیه دمگئے سرا اُرش کرتگ ءُ یک لوگئے چاربند کنگ ءَ رَند، لوگ ءَ نندوکیں مردمانی گون ءَ کریب دو ساھت ٹکّر اِش زورتگ. اے ٹکّر ءَ دو سلاہ بندیں مردم کُشگ بوتگ.

ھمے تَچکیا، مُرتزا جوکار سیستان ءُ بلوچستان ئے انتزامی کمانڈر ئے جانشین ءَ داواہ کرتگ دزاپ ءَ گوں پلیسئے کارواییا سلاہ بندیں آوار جنوک جَنَگ بوتگ اَنت ءُ آوار جتگیں مردمی آجو کنگ بوتگ ءُ «اےکارواییا، آوار جنوکیں دو سلاہ‌بندیں مردم کُشگ بوتگ.»

رَسانک نیوز/ پنچشمبے 12 شهریور ماہ 1405، پهرہ ئے ابتر دمگ ءَ کپوتانی سرا ٹکّر ءُ جیڑہ ءَ سئے بلوچ کُشگ ءُ جنیں آدمی ءَ تیر وارتگ ءُ ٹپّیگ بوتگ. اے ٹکّر پد چہ اشیا کہ لهتیں کپوت دُزّی بوتگ ءُ آیانی واھُندییے سرا پیش آتکگ.

رَسانک ءَ کُشگ بوتگیں بلوچانی پجّار «کامبیز آرتا»، «ابدلسلام آرتا»، ھر دو تاج‌مهمد ئے چُک ءُ آیانی گُهارزاتک «امیر‌مهمد بندویی»، ابداللّه ئے چُک زانتگ، ٹپّیگ بوتگیں جنیں آدمئے پجّار «سنجی‌ملک آرتا»، ابدلسلام ءُ کامبیز ئے مات زانتگ.

رَسانک ءِ ھال سرکنوکانی رِد ءَ، اے جیڑہ ءُ تیرگواری پد چہ اشیا کہ آرتا ھاندانئے لهتیں کپوت گار بوتگ ءُ آیان ءَ داواہ کرتگ کہ دیمیں مردمان ءَ مئی کپوت دُزّتگ اَنت. یکے چه گُمانداریں مردمان ءَ تیرگواری کرتگ که اے تیرگواری ءَ چار مردم ءَ تیر وارتگ.

رَسانک نیوز/ سئے شمبے 10 شهریور ماہ 1405 ءِ بانگواہ ءَ، دُزاپ ءِ بندیگجاہ ءَ بلوچیں بندیگے کہ چہ چهبار ءَ پہ «دُزّی ءُ لجّ ءُ گئیرت ئے سرا دست دراجیئے» الزاما دزگیر بوتگ ءُ پاھو ئے ھُکمی وارتگ، پاھو دیئگ بوتگ.

اے بندیگئے پجّار «سینا اَلی‌پور»، 26 سالگ، ھسن ئے چُک، لاشار ئے بند دمگئے نندوک ءُ چهبار ءَ جهمنند زانگ بوتگ.

ھال وشّئے ھالانی رِد ءَ، سینا اَلی‌پور سال 1402 ءَ ھماں وھدا کہ دُزاپ ءَ وتی اجباریئے ھزمتا بوتگ پہ مُرھسی ءَ چهبار ءَ شُتگ کہ اُداں نزامی ٹولییا پہ گوَشتگیں تُهمت ءَ دزگیر کرتگ ءُ گوں پرمندھئے دیمرویا چهبار ئے آمیدگِس آییا پاھو ئے ھکم داتگ.

اَلی‌پور ئے ھاندانئے نزّیکیں ھال سرکنوکان ءَ گوَشتگ: آییا وتی سرا بستگیں بُهتان رَد کرتگ اَنت ءُ چہ پرمندھئے دیمروی ءُ اِنساپ ءِ جاور ءَ ناراز بوتگ. اے بندیگ 40 روچ پیسرا چہ چهبار ءَ پہ دُزاپ ءِ بندیگجاہ ءَ شور دیئگ بوتگ. سربوتگیں ھالانی رِد ءَ، آییا پہ پاھو ئے دیئگ ءَ شور داتگ.