شگربی بلۆچستانئے جهمنندێن بلۆچیئے آوار جنَگ گۆن هِژم و زپت زۆریا، چهبارا سپاهئے اداره اتلاهاتئے نێمگا

رَسانک نیوز

دوشمبهئے رۆچا ۳۰ بهمن ۱۴۰۲، زاتی درێسێن اتلاهات سپاهئے نیروان گۆن هپت سیاه و اِسپێتێن تایلندی ماشینان رند چه اشیا که گلشهرئے دمگان چهبارئے شهرا اُرش برتگ یک بلۆچ جهمنندے که بلۆچستانئے شگربی نندۆکے بوتگ آوار جتگ و نامالومێن جاهے بُرتگِش.

اے بلۆچ جهمنندئے پجّار “ماشۆک موسّا زهی” ۳۰ سالگ انتی، اکبرئے چُکّ اِنت، تربتئے نندۆک بلۆچستانئے شگربی مردمے گوشگ بوتگ.

گۆن اے رستگێن هالان، اتلاهات سپاهئے نیروان که گێشترێن نکاب پۆش بوتگ‌اَنت، ماشۆکِش گۆن جنَگ و ٹپیگ کنگ آوار جتگ، آییئے چمّش بستگ‌اَنت و پدا آییئے لۆگئے سرا اُرش جنگا رند، آییئے لپ تاپ و زاتی چیزّش برتگ‌اَنت.

گوشگی اِنت که ماشۆک کساس دو سال پێش کانونی درۆشما و گۆن اێرانئے ویزایا بلۆچستانا آتکگ و چهبارا سُهرئے زیرگ و بها کنگئے کارا مشکول بوتگ.

اے جهمنندئے پِت که چه مزنێن سیاسی مردمان اِنت کنسولگرئے رئوگا کراچیا، اێرانئے جمهوری اسلامیئے رژیمئے سپارتا مان اسلام آبادا وتی چُکئے کارئے پدا بوتگ که سپارتئے کارندهان آییئے جُرم په “درآمدێن مُلکانی اداره اتلاهاتئے جاسوسیئے” گوَشتگ.

گوشگی اِنت که چه ماشۆکئے هال و اهوال آییئے جانئے سلامتیا تان انون هچ هالے نرستگ و آییئے کهۆلئے مردم سکّ پرێشان اَنت.